بسام توفيق عبد الملك يكتب: الشروط الواجب توافرها فى عضو البرلمان القبطى

لكى تصبح نائب قبطى في البرلمان و نظرياً تُمثل الشعب، وضعت حكوماتنا المتعاقبة منذ ثورة يوليو بعض الشروط و القواعد عادة لابد من توافرها في المواطن المسيحى لكى يتم الإنعام عليك بلقب “ممثل الشعب”، مع أنك في الواقع تُمثل الحكومة.
و لماذا يتم إختيارك من الأساس و الأصل في الأمر هو الإنتخابات ؟ ، ببساطة لان القاعدة منذ ثورة ٥٢ أن نتيجة إنتخابات المرشحين الأقباط، مثل نتيجة مدرسة النجاح الثانوية في مدرسة المشاغبيين هى لم ينجح احد….!
اولاً اسمك …لابد أن يكون مميز يعنى ماينفعش تبقي عادل نصحى فؤاد ….لازم اسمك يكون فية مرقس، ادوارد ، لويس ، استفانوس ….اسم كدة يرن في الودان اثناء اداء القسم و يتعرف منة بسهولة ان الرئيس بيقدر دور الاقباط صمام الانسان و شركاء الوطن .
ثانيا تكون ذو وظيفة مرموقة علشان تبقي حجة عندما يسأل لماذا تم اختيارك …يعنى مستشار سابق، لواء سابق “جيش او شرطة ” ، وكيل وزارة سابق ..مش مهم اضفت اية لوظيفتك المهم انك وصلتلها ! و علشان تكون وصلت لوظيفة من دول لازم كنت بتقول …..! الاجابة في رقم ٣
ثالثا بتقول حاضر …امال يعنى بقيت لواء في الجيش او الشرطة ازاى و غيرك من الاقباط بياخد اللقب و يتقاعد ….و علشان كنت بتقول حاضر فاكيد هاتفضل تقول حاضر يافندم و تبقي واحد من اللى بيهللوا للرئيس و يرفعوا ايديهم بالموافقة على اى حاجة بتقولها الحكومة و يهاجموا المعارضة الغير وطنية كلة بأشارة من ايد زعيم الاغلبية .
رابعا يكون مرضى عنك من الاخوان و السلفيين في منطقتك او دايرتك لانة مش معقول هايسبوك في حالك بعدما تم اختيارك ….يعنى مشكلة هنا عربية تتحرق هناك ابن يتخطف مفيش مشكلة و لو عندك بزنس تبقى لقطة …سوف يتم استغلالك على أكمل وجة … هاتشغل اولاد المسؤليين فى شركتك بمرتبات خيالية , هايتم استغلال موظفينك فى الانتخابات , هاتوافق على مشروعات خسرانة و تشارك فيها حتى لا يتم احراج الحكومة ,هاتتبرع لمشروع مكافحة البلهارسيا و القراءة للجميع و تنظيم الاسرة و صندوق تحيا مصر …الخ الخ الخ
خامسا تكون على خلاف مع الكنيسة ..مثلا غير ارثوذوكسي ، مختلف مع قيادات الكنيسة ، لا تعترف بسلطة الكهنوت ، ربما مسيحى أسما و ملحد في نفس الوقت او اسمك جمال …..اترك باقي الاسم لذكاء القارىء …من الآخر كل هذا لتبرير مهاجمتك للكنيسة عندما يتم استخدامك لهذا الغرض .
سادسا محسوب على الكنيسة ….طيب ازاى ؟ هو الشئ و عكسة ؟ يتم اختيار بعض الاسماء بناء على ترشيح رجال الكنيسة المقربين للسلطة ( و هم ظاهرة حتى في عهد الاخوان كان لهم دور) و يتم اختيار هؤلاء للتلويح للشعب القبطى ان هناك رضا بين الكنيسة و السلطة و بالتالى يتم استخدام نفس رجال الكنيسة في التأثير على الشارع القبطى( خاصة القطاع البسيط منة ) لتمرير بعض الامور او لغض البصر عن امور آخرى ….
سابعا تجيد دور احمد ذكى في فيلم معالى الوزير بمعنى تشتغل مخبر لصالحهم و تكتب تقارير حتى على أخوتك لتضمن رضائهم و بالتالى اختيارك مرة آخرى في منصب آخر بالتعيين كمسيحى آيضا فاكرين السادة النواب الذين صفقوا لقرار الرئيس المؤمن عندما آمر بعزل قداسة البابا شنودة كان فيهم أقباط .. شفتم ندالة أكثر من كدة
ثامنا يا حبذا لو أن الاسم المختار سيدة يبقي كدة ضربنا عصفوربن بحجر قبطية محسوبة على الاقباط و سيدة محسوبة هل السيدات و كمان ماحدش هايسمعلها صوت مش كفاية انها بقيت عضو برلمان و هاتحضر قداس العيد مع الصفوة في الصفوف الامامية بجوار فينيس كامل جودة .
تاسعا يجيد التحليل (اقصد التطبيل ) لانة / لانها سيكون ضيف على الفضائيات سواء التلفزيون الرسمى او القنوات الخاصة الناطقة بأسم الحكومة كونة يمثل الاقباط ….و سوف تجدة يدافع عن الحكومة و كأنها امة و يدافع احيانا عن الاسلاميين اكثر من الازهر …..معلش عايز يأكل عيش و يطلع في التلفزيون علشان ام العيال .
عاشرا

واحد فيكم ممكن يسألنى …ماهو دور عضو البرلمان تجاة قضايا بنى ملته من المسيحيين ؟ الإجابة ….. شوف الاعضاء الغير موقرين عملوا اية تجاة احداث المنيا
المتوالية و انت تعرف او هارد و اقول …الاقباط ليهم رب اسمة الكريم
كتب الصديق ابرام مقار على صفحتة منذ ايام حدث يلخص هذا الامر الا وهو فى فترة التسعينات سأل أحدهم المُتنيح قداسة البابا شنودة من من الاقباط سوف ترشحونة للعضوية مجلس الشعب ليمثل المسيحيين؟ .. فأجاب قداستة المسلم” فرج فودة”