شعر جورج عبد المسيح: شهر واحد مش كفاية
شهر واحد مش كفايه
انا جاي ادفع نصيبي ..
مد ايدك جوه بيتي جوه جيبي …
وانت ماشي خللي بالك م الزباله والتراب …
وفيه عيال ماشيه حافيه وناس كتير وإخداها عافيه واللي واقف ع النواصي م الشباب …
لما تفتح الدولاب …
فيه قميص وكام شراب ..
نصهم من الغلب داب …
اللي فوق دي صوره ابويا كان بيحكي لينا ياما عن وطن وليه كرامه بس غاب …
م العيا ومن الاكتئاب …
لما ضاع الحلم منه وطلع وهم وسراب …
والولاد محتاسين محتاجين درس كيمياء وحساب …
بالمناسبه فيه جواب ..
اعلان قضيه ديون عليا
وشهر مكسور م الايجار
عايزين ننكس العقار
ياريت تسدد الحساب
ماشي ليه
انت زعلت والا إيه ؟؟؟
هو ده قدري و نصيبي …
لو انا نور عنيك
فاكيد انت حبيبي …
