سعيد شعيب يكتب: أخي المسلم اذا كنت شايف ان الخلافة جزء من الدين .. أسف انت مشروع ارهابي Reviewed by Momizat on . ايوه متتخضش هقولك ازاي وفكر في كلامي. اولا الخلافة يا سيدي اللى بيسموها "اسلامية" لا يوجد آية واحدة في القرآن الكريم تقول بأن الله جل علاه امرنا بها. وحتى الأحا ايوه متتخضش هقولك ازاي وفكر في كلامي. اولا الخلافة يا سيدي اللى بيسموها "اسلامية" لا يوجد آية واحدة في القرآن الكريم تقول بأن الله جل علاه امرنا بها. وحتى الأحا Rating:
انت هنا : الرئيسية » مقالات » سعيد شعيب يكتب: أخي المسلم اذا كنت شايف ان الخلافة جزء من الدين .. أسف انت مشروع ارهابي

سعيد شعيب يكتب: أخي المسلم اذا كنت شايف ان الخلافة جزء من الدين .. أسف انت مشروع ارهابي

سعيد شعيب يكتب: أخي المسلم اذا كنت شايف ان الخلافة جزء من الدين .. أسف انت مشروع ارهابي

ايوه متتخضش هقولك ازاي وفكر في كلامي. اولا الخلافة يا سيدي اللى بيسموها “اسلامية” لا يوجد آية واحدة في القرآن الكريم تقول بأن الله جل علاه امرنا بها. وحتى الأحاديث النبوية اللي اتكتبت بعد وفاة سيدنا النبي (ص) بأكثر من ميت سنة مفيهاش حديث واحد صحيح يدعونا ليها، على اساس انها واجب ديني وجزء منه.
ثانياً مينفعشي حد يدافع عنها بأن هدفها كان نشر الإسلام، اذا كانت كده: هل تقبل إن حد من دين تاني أو أي معتقد تاني يحتلنا فرض افكاره علينا؟ وياريت كمان منخشش في جدل ان الخلافة اللي بيسموها “اسلامية” وحشه ولا حلوه لأن ده مش الموضوع الأساسي. الموضوع إن الخلافة معناها ببساطة ان فيه شوية مسلمين ( مش الإسلام ) قرروا يشيلوا السلاح ويحتلوا بلاد تانيه بالقوة. زي ما بريطانيا ما احتلت مصر وفرنسا احتلت الجزائر واسرائيل محتلة كل فلسطين. كله احتلال، ومش منطقى تشوف دول احتلال، لكن لما يكون المحتل مسلم تفرح وتنشكح وتسقف. فهل منطقي إن الله جل علاه العادل هيفرح انك بتحتل شعب تاني وتطلع عينه.
وحتى لو كان الإحتلال ده عظيم وعبقري، وده محصلشي زي ما بيقول الإرهابيين المسلحين وغير المسلحين، وده طبعاً مش صحصح، فهو برضه احتلال.
صعب إني انا وانت نبقى رافضين الإحتلال الغربي لبلادنا، ونبقى مرحبين باحتلال قبيلة من الجزيرة العربية لبلادنا. أو نبٍقي مبسوطين من احتلال الأتراك لينا لأنهم مسلمين.
اذا عملنا كده وصدقنا كلام الإخوان وغيرهم شيوخ ومؤسسات دينيه، ده معناه أني انا وانت كمسلمين بندي الإحتلال شرعية دينية، وبننسبه لربنا وللإسلام بالعافيه، وبنحوله لفعل حلال وامر إلهي.
ده معناه برضه اني كمسلم مقرر احتل غيري، انا بس مستني الفرصة لما املك القوة واحتل بلاد مش بلادي، ونحكمها بالعافيه، وطبيعي أنك تتضطهد اهلها، إمال هتحكمهم ازاي، هتحكمهم ازاي وانت غريب عنهم.لازم تصدق أنك احسن منهم، يعني همه كفره وكده.
عشان كده بستغرب وياريت تفكر فيها، احنا ليه فخورين بالأندلس، رغم انك لو فكرت شويه هتلاقيها عباره عن ايه؟ شويه مسلمين شالوا سلاحهم واتوكلوا واحتلوا ارض مش ارضهم واقاموا خلافه أو دوله صغيره عليه، يعني احتلال استيطاني زي اسرائيل. ولزقوا كل ده بالإسلام عشان مصلحتهم مش عشان الإسلام، يقولوا انهم حماة هذا الدين العظيم عشان يقعدوا على قلب الشعوب. لو سمحت متقوليش بقى ان كان فيها علم وحضاره وكده وكل الناس كانت عايشه زي الفل، مسيحيين ويهود وغيرهم. لأن زي ما قلتلك الأصل إنه احتلال حتى لو عملها جنه. والحاجه التانيه اذا كانوا عملوا حضاره عظيمه زي ما بيقول الإسلاميين.. طيب ليه معملوهاش في بلدهم في الجزيره العربيه؟ ثم إنها كمان في الحقيقة مكنتش جنه، المحتلين دول عملوا مجاذر وبلاوي سوده في المسلمين وغير المسلمين. وبرضه حتى لو لو كانوا ملايكه فدول احتلوا ارض مش ارضهم.
مش بس الإحتلال اللي بنخليه حلال وإن ربنا بيأمرك بيه، لأ كمان توابعه من نهب ثروات الشعوب ازلال اهلها المختلفين عنك في الدين وكمان احيانا بتضطهد مسلمين زيك، ونهب ثروات الكل .. إمال حضرتك وانت بتحكمهم تعيش انت وجيشك وعشيرتك منين؟ وطبعا خد عندك بقى السبي ويبقي اهل البلد درجه عاشرة وانت الكل في الكل لأنك مسلم وبتحكمهم. ( اكيد فاكر اللي كانت داعش بتعمله واللي موجود زيه بالظبط في التاريخ اللي بينسبوه للإسلام ).
الكلام اللي بيقولوه ليك بقى عن “الحضارة العربية الإسلامية” محتاج شوية تفكير، أولا لأنه لا يجوز نسبة ذلك للإسلام، فلا يجوذ أن نعتبر افعال بعض المسلمين هوه الإسلام. ثانياً محتاجين نفكر: زي ما قللتلك قبل كده اذا كانت الجيوش اللي جت من الجزيره العربيه عندهم حضاره عظيمه، ليه معملوهاش في بلادهم؟ هل المعرفه والعلم وغيرها اللي انتجتها الشعوب المحتلة ينفع ننسبها للمحتل، مش للشعب اللي انتجتها. اقصد ان مثلاً المصريين اللي احتلهم بعض العرب من الجزيرة العربية كان عندهم حضاره عظيمه زي ما انت عارف، وكمان انتجوا معرفه بعد ما الجيش العربي احتلها، ليه مش بيتم نسبتها للمصريين، واللي انتجه اهل الشام ننسبه لأهل الشام وكده. لأننا لو نسبنا ده للمحتل، يبقى معنى كده انك موافق على أننا ننسب ما قدمه مصريين عظام زي طه حسين والعقاد وغيرهم وغيرهم للإحتلال البريطاني ونقول إنه حضارة بريطانية ويتفاخر بيه البريطانيين وكده. وكماان ننسب اللي انتجه المصريين من علوم وثقافة للأتراك اللي كانوا محتلين بلدنا.
لا زم اسألك : هو انا وانت وناس كتيره زعلانين ليه من الإخوان؟ ما احنا زيهم، همه عايزين “الخلافة” مش مصر بس، مصر بالنسبه ليهم مجرد محطه. فاكر لما مرشدهم مهدي عاكف الله يرحمه بقى قال” طظ في مصر وابو مصر واللي في مصر”، كان قصده ان الخلافه اللي بيحلم بيها اهم من بلده واهل بلده.
ممكن اسألك وأسئل نفسي احنا زعلانين ليه من داعش؟ ما هي برضه احتلت بالسلاح اجزاء كبيره من سوريا والعراق وعملت الخلافه، ولو كانوا استمروا وملكوا القوة لكانوا فرضوها على العالم كله بالسلاح. مفيش فرق في الحقيقة بين خلافة داعش (اللي بتنسب نفسها للإسلام ) وبين الخلافه اللي في دماغك ودماغي ودماغ كتير من المسلمين، كله احتلال بالقوه.
مهم اني اقولك ان “استعمار قبيلة قريش” واستعمار الأتراك، مش مختلف عن أي استعمار للإمبراطوريات القديمه، زي الإمبراطورية الرومانية والبيزنطيه والفارسيه وغيرها وغيرها، نفس الجرايم. بس الفرق انك مش هتلاقي حد روماني يقولك عايزين نحتل العالم تاني أو حد بريطاني يقولك بفخر “فين ايام الإمبراطوريه اللي مش بتغيب عنها الشمس، عايزين نرجع نحل مصر تاني” أو يقولك عايزين نرجعها لما نبقى اقوياء وان كان فيها حضاره وعلوم وكده. احنا بس المسلمين اللي للأسف عندنا حلم استعادة الإمبراطورية اللي بيسموها “اسلاميه”. وبيسموها كده عشان انا وانت ننخدع فيها، وممكن نقتل نفسنا ونقتل غيرنا عشانها.
طيب ليه بقولك هتبقى ارهابي؟ 
لأن الإرهابي هوه في رأيي اللي بيفرض على غيره افكاره أو دينه أو مذهبه بالقوه. واذا كان ارهابي حنين شويه هيخلي المسيحيين واليهود يدفعوا الجزيه ويعيشوا مواطنين درجه عاشره. اما باقي البشر من اديان ومعتقدات تانيه فملهمشي مكان في الخلافه دي.
بقترح عليك اني انا وانت وكل المسلمين نفكر تاني في حاجات اترسخت في عقلنا وقلبنا ولا علاقة لها بالإسلام، حاجات بتخلي مجموعة من المسلمين يتحولوا الى ارهابيين بسهوله.

© 2013 Developed by URHosted

الصعود لأعلى