إيهاب يني يكتب: الفضائيات القبطية (2)
كنت قد وعدت في المقال الماضي ، أن نستكمل الحديث عن الأعلام القبطي …..
وكنت أنوي الحديث عن تكاليف هذا الأعلام ، وعن تأثيره علي الأقباط سلباً كان أو إيجاب ….
وإذا كان هذا الأعلام يخدم قضيتهم الأساسية ، التي هي الحرية والمساواة علي أرض الوطن …..
ولقد بحثت في المواقع التي انشأتها كل قناة علي الأنترنت ……
بحثت عن أي معلومات بخصوص المصاريف التي تتحملها القناة من أجل إستمرارها في تقديم الخدمة للمشاهد ….
بحثت كثيراً لكن لم أجد أي رقم محدد ، يدل علي التكلفة التي تتحملها أي قناة منهم ، في كل المواقع …..
لكن لفت الأنتباه أن جميع القنوات أنفقت في مواقها الشخصية علي أن تكاليف البث مرتفعة جدا …….
ولاحظت أنهم كلهم لديهم روابط للتبرعات عن طريق البنوك بالشيكات ، أو التحويلات الواير ( wire transfer ) ، أو عن طريق الكريدت كارد ( كروت الائتمان ) …..
وكله مقبول منك يا مواطن ……..
بس أنت شخلل جيبك وطلع محفظتك والرب يباركك ….
ومتنساش أن ما تتبرع به يتم إعفائه من ضرائبك …..
يعني هتعمل خير ….
وببلاش …….
وهنيئ لك يا فاعل الخير ……
ملحوظة : ( طبعا هذا غير حقيقي لأن ما لا يخضع للضرائب هو جزء من المبلغ ، وليس المبلغ كله يحصل علي الاعفاء الضريبي ) ……
اتصلت بأحد الأصدقاء القدامي في كاليفورنيا ، الذي أعلم أن له إتصالات ومعارف في هذه القنوات ….
حدثته عن الامر وطلبت مساعدته في الحصول علي معلومات بخصوصه….
رحب الرجل بسعة صدر ووعد أنه ( هيعمل اتصالاته ) وسيرد علي بالتليفون قريباً بعد فترة الاعياد …..
المهم …….
أتصل الرجل منذ أيام …..
– أيه الأخبار …..؟؟!
– الحمد لله …….
– يعني أخبارك أيه …. أيه الجديد …….؟؟!!!!!
– الحمد لله …… ماشية ……
– طيب …. كويس أنها ماشية …….
فيه أخبار بخصوص الموضوع اللي اتكلمنا فيه ؟؟!!!!!
– طبعا ….. الحمد لله ……
– يا سيدي يستاهل الف حمد والف شكر ……..
طمئني وقول …….
قل ما عندك يا فتي !!!!!!! …….
قال …..
– أتصلت بأكتر من واحد لاني شعرت بأهمية الموضوع ……
وحبيت اساعدك علي قد ما اقدر ……
بس انت عارف ايام اعياد وناس كتير مسافرة …..
لكن ربنا قدرني وفيه ناس ردت علي التليفون …… وناس تانية مردتش …..
ده حتي منهم من تركت له رسالة صوتية علي تليفونه وشرحت له الامر لكنه لم يعاود الاتصال …… بس اوعدك هبقي اكلمهم مرة تاني ……
– ياسيدي تعيش ….. تترد لك في فرح غاندي ابنك ……
ملحوظة : صديقي هذا عاش فترة في الهند ، ويعشق الماهتما غاندي الذي حرر الهند من الاستعمار الانجليزي …. لذا اطلق علي ابنه الوحيد اسم غاندي ….
ما علينا …..
نكمل …….
أكمل صديقي …..
– ماكنتش متصور ان الموضوع صعب كده …..
اتصلت بأكثر من واحد …. وكل ما افتح معاه موضوع القنوات الفضائية ، يبتدي يلف ويدور ، ويتهرب من الاجابة ….
كأنك بتسأل عن اسرار حربية …..
بعضهم اتحجج بأن وراه ميعاد طبيب ولازم يمشي وهيتصل بعدين ….. لكن لم يتصل …….
واحد تاني قال انه ” بيشحم “عربيته في البنزينة ولما يرجع البيت هيكلمني …. بس طول لغاية دلوقت مش عارف ليه !!!!!……
– معلش الدنيا مشاغل انت عارف ….. والناس عندها ظروفها ومشاغلها …… ربنا يعين الكل ……
– بقول لك انه قال : ” بيشحم العربية ” ……
هي العربيات في امريكا بيتم تشحيمها ؟؟!!!!!
– قلت له بإستعجاب : لا …..عندك حق …… ده حتي آخر مرة شحمت فيها سيارتي كانت في اسيوط من ٢٨ سنة !!!!!!!……
– ماهو ده اللي عايز اقوله …… ده كان بس بيتهرب من الموضوع !!!!….
– للدرجة دي الموضوع خطير ؟؟!!…….
– اه …. زي ما بقول لك كده ……
المهم …. مش هطول عليك ….. اتصلت بالناس …. اللي اتكلم وعطاني معلومة شكرته ….. واللي ماعطاش برضه شكرته ……
– تشكر يا باشا …… مانتحرمش ……..
– وعملت بحث في الانترنت علي جوجل …..
واتصلت بشركة متخصصة في البث عن طريق الاقمار الصناعية ….. زي نايل سات وعرب سات وهوت بيرد ….. عطوني ارقام مبدئية …..
عندهم باقات ….
كل باقة تختلف عن الثانية في السعر …..
والسعر بيتحدد علي اساس عدد الساعات اليومية للبث …. يعني القناة اللي بتبث برامجها ٦ ساعات يوميا فقط لها سعر ….
والقناة اللي بتبث ٧/٢٤ يعني بث مستمر بدون توقف لها سعر تاني ….
كمان جودة البث لها تأثير في السعر …. 4K سعره يختلف عن 1080 HD …..
مش بس كده …..
سألت لك كمان علي اسعار الايجار واسعار الشراء للعقارات في المناطق التي فيها مقر لاحد الفضائيات القبطية المعروفة في كاليفورنيا …..
انت عارف ان كاليفورنيا يتم منها بث معظم القنوات …..
– ده كلام عظيم …… اعطيني ارقام …..
اكمل وكأنه لم يستمع ……
– الموضوع كبير ….. مش زي ما تتصور ….
– مش متصور حاجة صدقني …. وكاميرة التصوير اللي في المحمول خربانة ….. كمل الله لا يسيئك !!!!!…..
– هكمل اديني اهووههه ….. ما تستعجلش !!!!!!!
– لا مش مستعجل …. خد راحتك ياابو غاندي ……
– اولا : المكان اسعاره بتختلف بحسب المساحة وبحسب المكان وبحسب التشطيبات …..
وايضا بحسب مدة العقد …..
لو شراء وبيع فأقل مكان به مساحة تتسع لعدد ٢ استوديو بث وريسبشن وحجرة للاجتماعات وحجرة للاستراحة وغرفة اخراج وبث واماكن انتظار للسيارات ….
هذا المكان لن يقل ثمنه عن ٣/٤ مليون دولار ….. ويمكن اكثر لو ان المطرح موجود في منطقة معروفة في ال ايه ( LA) اختصار لمنطقة لوس انجلوس الشهيرة بكاليفورنيا ……
– طب لو ايجار ؟؟!!!!!!
– من ٢٠ الي ٤٠ الف دولار شهريا !!!!!!
وخد عندك برضه غير المكان ……
ثمن كاميرات التصوير وثمن انظمة الاضاءة وانظمة الصوت ……
طبعا ده بخلاف السوفت وير لكل حاجة من دول …..
كمان ديكورات للاستوديوهات ……
وعزل صوتي للاستوديوهين اللذين يتم من خلالهما البث المباشر او تسجيل البرامج …..
دول ثمنهم لن يقل عن ٢٠٠ الف دولار …. بالميت !!!!!!
– بالميت ؟؟!!!!!! …….
طب بكام من غير الميت
( قلت في بالي نوفر شوية … واللي نوفره يستفيد منه الغلابة والفقراء ) ……
– انت بتهزر …..
– لا …. كمل …. بالميت بالميت ….. مش مهم ….
– ثانيا : المصاريف الثابتة …….
فاتورة الكهربة والغاز والتدفئة والمياه ….. وهذه مش اقل من ٢٠٠٠ دولار كل شهر …..
ثالثا : تكلفة البث المباشر بالاقمار الصناعية ودي ارقام كبيرة ……
بس يكون في معلومك ان البث عن طريق الانترنت ارخص كتييييييير خالص من البث من خلال الاقمار الصناعية ……
وعلي فكرة كلهم ( كل الفضائيات القبطية ) بيبثوا عن طريق الفضاء والنت معا !!!!!…….
وده تكلفته ١٥ الي ٢٠ الف دولار !!!!!!!…..
– في السنة ؟؟!!! …….
– لا طبعا …. في الشهر ياخويا …… !!!!!!
رابعا : وهذا هو اهم البنود ……
مرتبات الموظفين …….
وده بند صعب مش هقدر احدده بالظبط !!!!!!……
– ليه مش هتقدر ؟؟!!!!! ……
بالعكس ده المفروض انه اسهل بند ، لأن القانون الامريكي بيشترط انك تعلن عن الوظيفة في وسيلة اعلام ، وتحدد فيها شروطك في المتقدمين للوظيفة ، وتحدد ايضا المرتب الذي تمنحه القناة للموظف الذي …….
قاطعني ……
– قانون ميييين يا عم …….
انت سبت مصر امتي ؟؟!!!
قلت: وايه دخل الموضوع ده في علاقتي بمصر ؟! ….
دي قناة في امريكا ، تخضع للقوانين الامريكية ، ولا علاقة لها بتاريخ مغادرتي لمصر …..
– مالهاش دعوة ازاي ؟؟!!!!……
ده بقي اللي انت مش فاهمه !!!!!!
– طيب فهمني …… ينوبك ثواب يا ابو غاندي ….
– شوف يا عم الشباب ( ده انا طبعا ) …..
المصريين لما بيهاجروا من المحروسة مش بيهاجروا بالجسد فقط ….
يعني مش بتجيب البني آدم من دول وتحطه في طيارة وتنقله من مصر الي امريكا ……
والموضوع ينتهي ……
لاااااااااااا …..
الموضوع اكبر بكتير من كده ……
المصري بيجيب معاه افكاره ومعتقداته و كل ما يؤمن به في عقله ……
– طيب ايه المشكلة ….. ده طبيعي ….!!!!
– ما انا جاااااااايلك في الكلام اهوه …..
خليك معايا عشان تفهم …….
احنا المصريين مالناش في القوانين ولا في الاعلانات المبوبة عن الوظائف ولا الكلام الفاضي ده كله …..
احنا شعب يحب الفهلوة ….
شعب ذكي ……
شعب دهن الهوا دوكووووو …..
خلي العجل يعدي البحر ولا يغرقشي ……
اومماااال ايه يا كبير !!!!!! ……
( تشكر يا عم الحاج – في سري طبعا – ….. ما انا بقيت عم الشباب وكبير ف ١٠ دقايق !!!!!!!)
الوظايف دي بياخدها الاقارب والعشيرة …..
والقنوات دي معمولة لهم من الاصل علشان تكون عارف …..
هتلاقي القناة صاحبها معين فيها مراته مذيعة …. واخته مهندسة تصوير ….
ومش عارف مين من اقربائه في الاضاءة والاخراج .الاعداد ……
زي ما بقول لك كده ……
طب جرب كده تقدم علي شغل في اي قناة منهم وأهي ذقني لو اتعينت …..
ده لو اتصلوا بيك علشان تعمل انترفيو من الاساس تبقي محظوظ ……
عارف فلان اللي في القناة الفلانية ؟؟؟!!!!! ….
ده مراته فلانة المذيعة في نفس القناة …….!!!!!!
وبنت اخته اللي اسمها ( …..) شغالة معاهم في الاعداد …..
ومسئولة العلاقات العامة برضك من العيلة !!!!!!
طيب بلاش ده علشان قناة خاصة وفاتحها بفلوسه رغم انه من اسرة متواضعة ولا يعلم احد مصدر هذه الاموال !!!!!!!!
خليك في القنوات اللي تابعة للكنيسة ومتمولة من اموال الشعب اللي هي اساسا اموال الفقراء واخوة الرب ……
عارف المذيعة الفلانية اللي في القناة الفلانية ؟؟!!!
دي قريبة الانبا ( فلان ) بالجسد …..
وطقم القناة كله معارف واقارب وجيران وشمامسة ….. محدش بيتعين الا بالوسايط وبالامر المباشر من جناب الاسقف …..
قناة ( …..) القبطية الاخري ….. برضه نفس النظام ….
عايز تعرف ليه بيحصل كده ؟؟!!!!!!
هقولك ليه بيحصل كده !!!!!!!!!
– ليه ؟؟!!!!!!
– اصل مرتباتهم عالية جدا ومحدش فيهم هبيطرد حد من العمل …..
تفتكر فلان ممكن يطرد مراته او يطرد حد من اقربائه ؟؟؟!!!…….
مش ممكن !!!!!!! …..
وكمان كل واحد فيهم مهما اختلفوا في السر بيداري علي الثاني علشان السبوبة تستمر ……!!!!!!!
شغل كبير يا عمنا ……
– كبير ازاي يعني ؟؟؟!!!!
هي المرتبات هناك عالية قد ايه ؟؟!!!!
يعني مثلا …. مثلا يعني …. عندك فكرة عن مرتب مذيعة في هذه القنوات يطلع كام تقريبا ….. مجرد علم بالشئ حتي نستطيع حساب التكلفة التي تتكلفها القناة بالتقريب لان هذا هو لب الموضوع ؟؟!!!!! …….
– لب مين يا عم وحمص مين …..
دي مرتبات فستق مقشر وعين جمل نقاوة !!!!!!!!……..
بقلاوة بالمهلبية ……
الواحدة فيهم مرتبها في الشهر من ١٠ الي ١٢ الف !!!!!!….. بالميت …….
– ١٠ في ١٢ يساوي ١٢٠ ……. ومعاك ميت ….
يبقي ١٢٠ الف سنوي …….
مش كتير ….
لسه اقل من مرتب كاهن مبتدئ في كنيسة صغيرة بالمهجر !!!!!!! ……..
– هو مرتب الكاهن كبير كده ؟؟!!!!
– آه …… ده مرتب الكاهن الصغير ….
الكاهن الامتياز اللي لسه بيتمرن ……
الكهنة الكبار مرتباتهم ٢٠٠ وانت طالع ……..
المهم ….
نرجع لموضوع القنوات الفضائية …….
تعالي نشوف كم سيتكلف بث القناة الواحدة لمدة سنة واحدة ……
عايزين نعرف ان كانت هذه القنوات تستحق هذا الكم المهول من الاموال ام …….
قاطعني بحدة ……..
بلا قنوات بلا ……
واستمر يسب ويلعن ٣ دقائق دون توقف …..
وقفل السماعة في وشي !!!!!!!…….
