مينا ماهر يكتب: حوار…. مالوش حل!! Reviewed by Momizat on . حيث اننا مقبلين على موسم انتخابات كندية مختلفة، جدير بنا أن نتأمل سوياً في من هم المرشحين، و نلاحظ اختلاف أجناسهم، وأديانهم، و توجهاتهم مما يجعلنا لا نستطيع إلا حيث اننا مقبلين على موسم انتخابات كندية مختلفة، جدير بنا أن نتأمل سوياً في من هم المرشحين، و نلاحظ اختلاف أجناسهم، وأديانهم، و توجهاتهم مما يجعلنا لا نستطيع إلا Rating:
انت هنا : الرئيسية » مقالات » مينا ماهر يكتب: حوار…. مالوش حل!!

مينا ماهر يكتب: حوار…. مالوش حل!!

مينا ماهر يكتب: حوار…. مالوش حل!!

حيث اننا مقبلين على موسم انتخابات كندية مختلفة، جدير بنا أن نتأمل سوياً في من هم المرشحين، و نلاحظ اختلاف أجناسهم، وأديانهم، و توجهاتهم مما يجعلنا لا نستطيع إلا إبداء كل الاعجاب والتقدير بتنفيذ مبدأ احترام الآخر بكل ألوانه ومذاهبه، عملياً وليس بالشعارات الفارغة! الأمر الذي لا يتركنا دون أن تنزلق اقدامنا الى خوض مقارنة فطرية بين سير الانتخابات الكندية ومثيلاتها في بلادنا! 

لن أطيل الشرح والتفصيل وسأدع الحوار التالي يلخص لكم الفكرة ببساطة:

– صباح الخير يا فندم

– زفت!…انا في حالة كآبة لا تحتمل!!

– ليه يا فندم؟

– انت بتسأل؟! ما انت عارف بقى فترة الانتخابات و قرفها!!

– بصراحة يا فندم انا عندي ليك خبر برضه مش لذيذ!!! 

– ايه تاني؟! هو انا ناقص؟

– فيه مرشح اسمه سامي نبيل ابراهيم الجوهري!!

– ماله دا راخر؟!  

– لا مافيهوش حاجة، بس….طلع قبطي!

– يا نهار اسود؟ قبطي و رشح نفسه ازاي دا؟ و ازاي فاتت عليكم انتم دي يا اساتذة! 

– خطأ غير مقصود يا فندم…أصل الاسم الرباعي محايد جداً وما كناش واخدين خوانة!! بس تحرياتنا عنه كشفت لنا القصة!!!  

– بس  ماينفعش!!! دا ضد الدستور!!!

– خلاص يا فندم نمنعه!!

– بعد ايه؟ ما خلاص…اسمه طلع…لو منعناه دلوقتى حنفتح علينا فتوحة… حقوق الإنسان بقى يطعنوا في الدستور…و الاقباط والثوريين وكمان المسلمين المؤمنين بالمواطنة مش حايسكتوا….

– طب خلاص…نخليه!!! 

– ماهو برضه ما ينفعش يا فالح …لا ولاية لغير مسلم على مسلم!!

– بس احنا دولة مدنية مش إسلامية!

– ايوة يا حبيبي بس احنا برضه بلد مسلم والإسلاميين والمتشددين مش حايسيبونا في حالنا!!! 

– طب ما احنا نخليه…بس مانقولش انه قبطي!

– هو فيه حاجة بتستخبى في البلد دي…وبعدين لو دخل ممكن يكسب!!! كل الأقباط حايدوله صوتهم اكيد…هو انت مستهون بتعداد الأقباط؟! دا ممكن يكتسح بالراحة!  

-طب العمل؟!

– مش عارف…كان مستخبي لي فين دا يا رب.

– احنا ممكن نشتري انسحابه!

– قديمة…حيعرفوا وحيشتمونا برضه!!

– طب نرشي اللي حواليه عشان ماينتخبهوش!!

– و حتصرف انت بقى عالحملة دي؟! حانجيب منين كل دا؟! من جيب ابونا؟! اقوللك….دعبسوا في ملفاته…ممكن نمسك عليه غلطة! 

– دعبسنا يا فندم…هو في الحقيقة راجل كفء وبصراحة عنده خطة رئاسية مش بطالة…عالاقل أحسن من غيره!

– عمر الكفاءة ما كانت مقياس!!!

– طب ما نحاول نهديه للإسلام…نجيب شيخ كدة من التقال و نقعده معاه!!

– و حياة امك؟!

– ما انا بأحاول اساعد حضرتك…يبقى مافيش غير اننا نخلص منه!!

– ناقصين احنا…لا لا…إنسى الموضوع دا!

– طب ممكن نغير الدستور!!

– نغيره تاني؟ يا راجل قول كلام غير دا!

– أو نلغي الانتخابات…

– طب ما نغير الشعب اسهل!!! 

– أو نستقيل و نخلي غيرنا يشربها!!!

– مال خيالك خصب كدة النهاردة؟!  و النبي نقطني بسكاتك!! هو انا ناقص…لسه باقولك مكتئب تقوم جايبلي خبر زي دا!!

– طب ما نعمله زي ما الامريكان عملوا وقت اوباما؟!

– اوباما ايه انت اهبل ولا بتستعبط!!! شعبنا لسه مش مستعد انه يقبل حد مختلف!

– ما أقصدش…اقصد أمريكا برضه ما بتسمحش المسلمين يحكموا وقلبت الدنيا لما اوباما قالوا عليه مسلم وقامت بجميع الإجراءات اللازمة على الملأ!!! ولا همها حقوق إنسان ولا دياولو! 

– بس يا حبيبي أمريكا هي حقوق الانسان…تعمل الحقوق و تكسرها ما حدش حيقولها بم! إحنا الموضوع معانا مختلف!

– طب نقول عليه مجنون!

– هو من جهة مجنون فهو اكيد مجنون انه رشح نفسه!! بس ما فيش وقت نثبت انه مجنون!

– طب الحل ايه يا فندم في الحوار دا؟

– مالوش حل!

– (يبتسم بخباثة) لأ فيه حل!!

– ايه هو؟!

– فاكر سعادتك لما خليتني آكل لحم جملي عادي على انه لحم غزال وضحكت عليَّ؟!

– آه فاكر…بس تقصد ايه؟ ندبحه ونطبخه يعني ولا ايه؟!  مش فاهم ايه العلاقة!! 

– العلاقة يا فندم…ان انا بأرد لك المقلب… مافيش حد قبطي مرشح نفسه!!!

– ورحمة ابوك!!!

– والله العظيم…

– يعني مافيش أقباط مترشحين؟

– و لا بيفكروا حتى يا فندم!! 

– الله يجازي شيطانك….أحمدك وأشكر فضلك يا رب…

– يا ترى حاسس بإيه دلوقتي؟!

– حاسس اني في غاية السعادة! حاطير مالفرحة!!

– انا قلت طالما كنت مكتئب، احسسك ان فيه مصايب ممكن تحصل اكتر ماللي احنا فيها!!! 

– اشكرك جداً…ياه هم و انزاح….فعلاً كل حاجة تانية تهون…بينا بقى نروح نتعشى برة احتفالاً بالمناسبة الهايلة دي!!

– حاتأكلني ايه يا فندم؟!

اقل منها؟! لحم غزال طبعاً!!

© 2013 Developed by URHosted

الصعود لأعلى