انا إللي أخدت حصة ديني على السلم
انا إللي أخدت حصة ديني على السلم
وانا إللي مشيت جنب حيطانك عشان أسلم
وانا إللي بكيت علي سنيني وأنتي مش شايفة
أصرخ بعلو الصوت من الظلم وأنتي ولا سامعة
ولما تعبت ... سكتت .. وياريت سكاتي كان أكرم
سكاتي وصراخي مش فارق .. مكاني متغيرش على السلم
انا الكافر ... انا الهامش المتهمش على سنينك
ولما أعافر واقول أسمي أهو شايفه على جبينك
أفتحي دفاترك ..... دوري
أسمي على غلافكَ..فكري
انا إللي كتبت أول سطر
انا إللي بدعت أول فكر
انا أول زرعه في طينك
انا الأصل إللي عانك وبيعينك
انا إللي عارفك .... وهما عاملين أنهم عارفينك
أشوف وشك القاسي في وشوش إللي سيباهم
يهينوا أسلافي ويلعنوا أهلي وباين أنتي وياهم
وأسأل نفسي على سكاتك
وأخاف لتكوني عليا طلقاهم
بيقولوا لي يا عضمة زرقا
قوليلي طيب.. مين إللي زرقها؟
لقيت أهانتي مش فارقة
قلت أفارق .... ملعون أبو إللي فرقها
أسيبك ... وبرضه أسمي علي جبينك
طيور مهاجرة أه ..... بس لسه حبينك !