مجتمع عليه العوضي … يشتري أي حاجة في رغيف!
طبيب مشطوب لا يخطئ أحد أن عنده مرض نفسي في حالة متقدمة بدل ما يتعالج أتساب يقول في التليفزيونات واليوتيوب والبودكاستس كلام ميدخلش عقل ضفدع بس بيغلف كلامه بكلمتين من الدين علي شوية كلام فارغ وطريقة حقيرة في التعامل مع المرضي، بيستهزأ بيهم دون الاعتبار للمرض أو للسن ولا لآداب المهنة! كل حاجة كانت بتقول إن الدكتور ده مريض نفسي محتاج يتعالج لكن أتساب للناس فترة طويلة وللأسف تسبب في ألحاق ضرر كبير بمرضي كتير وأتسبب في وفاة مرضى!
أسئلة كثيرة بتدور في عقلي: ليه الطبيب السابق ده أتساب الوقت ده كله؟! وليه المرضي وأهل المرضي يقبلوا كم الإهانة اللي بيتعرض ليها المرضي دي؟! و إزاي قطاع كبير من الناس صدقت الخزعبلات دي وماشية وراها؟! الراجل ده كان بيقول كل حاجة مش بس عكس العلم وعكس ما جاء في المراجع الطبية المعتبرة لا ده كان بيقول للمرضي حاجات ضد المنطق وبيعمل تصرفات ضد الفطرة الإنسانية السوية في تعامله مع المرضي ومع ذلك في الناس كتير قبلت وأمنت بالخزعبلات دي معتقدة أنه عالم آخر الزمان! طيب خل اللي قدموه ونظامه للجمهور هيتحاسبوا على ده؟! والسؤال الأهم ليه سهل تبيع للمصريين أي حاجة أو أي فكرة بمجرد أنك تربطها بالدين؟!
الموضوع ده جرس إنذار علشان ندرس ما حدث للعقل الجمعي للمصريين، وهل التعليم الموجود اللي أنتج اللي اللي بيحصل ده ممكن يعطي أمل! قطعاً لا !