يا تقل دمك يا باز أفندي! أقباط مين اللي يخلصوا؟!
من كام يوم خرج علينا الكاتب الصحفي صاحب اللا كاريزما، واللا حضور واللا موهبة واللا ثقافة واللا أي حاجة، وقال أن الوجود المسيحي في مصر كان سينتهي لولا الرئيس السيسي! مليون علامة تعجب يا باز أفندي، هو طبعاً كان عاوز يلحن وصلة نفاق للرئيس بس وسعت منه حبتين تلاتة قول تمنتاشر حبة، ومحمد الباز لمن لا يعرفه وطبعاً الأغلبية لا تعرفه إلا نفر قليل مش لأنه نكره لا سمح الله ده راجل أسمه لوحده معروف من أيام فيلم أبن حميدو، هو يا سيدي صحفي من وجهة نظري لا أرى منه تصريحات أو كتابات أو تراهات إلا في شيئين فقط، أولهما نفاق الرئيس والثاني الحقد علي باقي الإعلاميين زملاءه، غل بعيد عنك عزيزي الإنسان، تحس عنده تار مع كل إعلامي ناجح، يعني مثلاً هو ميطيقش عمرو أديب، ولا إبراهيم عيسى ولا مجدي الجلاد ولا حتى توفيق عكاشة ولا أي حد ناجح ، الحقد ده صعب أوي عزيزي المواطن ربنا ما يكتبه على حد.
آخر تصريح له عزيزي المواطن كان ينافق الرئيس كالعادة وقالك أهبد هبدايه عن الوجود المسيحي في مصر اللي أنقذه الرئيس السيسي (واخد بالك يا ريس، نظرة يا ريس أديني أي منصب إن شالله رئاسة تحرير برنامج طبق اليوم)، لا يا باز أفندي! لا يا راجل، كده يا باز أفندي؟! مسيحيين مين اللي يخلصوا يا باز أفندي؟!
هو أنت قريت التاريخ من أنهي زاوية يا باز أفندي؟!
أحنا محتفظين بأيماننا من ألفين سنة يا باز أفندي، قبل أي حد يعني يا باز أفندي!
وبعدين هو الإخوان ييجوا أيه جنب الرومان يا باز أفندي؟!
محمد مرسي ولا الشاطر ولا بديع ولا أي حد هييجوا أيه جنب دقلديانوس ولا نيرون ولا أريانوس والي أنصنا يا باز أفندي؟!
أحنا مبنخلصش يا باز أفندي، أحنا موجودين وهنفضل موجودين يا باز أفندي
وبعدين ليه محسسني أن العالم لو حصل في المسيحيين حاجة كان هيقعد يتفرج يا باز أفندي؟! هو أحنا في صحراء يا باز أفندي؟! لمعلوماتك يا باز أفندي المسيحيين في العالم تعدادهم علي أقل تقدير 2.4 مليار (من 2.4 مليار إلي 2.7 مليار) يعني تقريباً تلت سكان العالم مسيحيين يا باز أفندي، موجودين وهيفضلوا موجودين يا باز أفندي مش علشان رئيس ولا سلطان عاوزهم موجودين يا باز أفندي
اه تصدق يا باز أفندي تلت سكان العالم مسيحيين يا باز أفندي
بلاش هو محمد مرسي كان قدر علي نجيب ساويرس بس يا باز أفندي؟! ده بعت يسترضاه علشان يرجع يا باز أفندي! أهو ساويرس ده نفر واحد من الأقباط يا باز أفندي!
لا الإخوان ولا غير الإخوان! ولا أي حد يقدر يعمل معانا حاجة يا باز أفندي، كبير أي حد يطلع بتصريحين تافهين زي تصريحاتك دي كل فترة يا باز أفندي وده تمامه، لكن يخلص على المسيحيين، ده عند أمه يا باز أفندي! مقدش أمك طبعاً يا باز أفندي
أحنا موجودين مش بمزاج حد، أحنا موجودين غصب عن أي حد! ومنتشرين في كل حته وعلى فكرة العالم كله يعرف يعني أيه أقباط مصر، السكان الأصليين لمصر يا باز أفندي
لكن السؤال بقي يا باز أفندي، هي 30 يونيو كان تنفع من غير الأقباط يا باز أفندي؟! الأوقع تقول لولا أقباط مصر كان زمان مصير مصر يعلمه الله يا باز أفندي وأحنا مش بننكر موقف الرئيس السيسي في تلاتين يونيو لكن بنرفض أنك تربط وجود الأقباط بالرئيس السيسي ولو عاوز تعرف قيمة الأقباط يا باز أفندي جوجل كده أو حتى أتفرج علي ما قاله الإعلامي المحترم المثقف الواعي الأستاذ أبراهيم عيسي عننا يا باز أفندي
وتبقي كلمة، ألا تتفق معي أن الفنان العظيم توفيق الدقن كان عبقري في تشخيص تقل دم الباز أفندي لكن الحقيقة طلعت أتقل بكتير يا باز أفندي؟!