خد في وشه وقال مهاجر
يلعن أبو اللي صابر
قال هشوف ناس جديدة
قال هعيش في بلاد بعيدة
قالوا له يا ابني الغربة صعبة
قال وماله
هي يعني بلادنا رحبة ؟!
وخد في وشه وراح مهاجر
والسنين فاتت وعدت
وكل حاجة تشوفها جدت
بلاد جديدة
وناس جديدة
والقديم بقي ذكريات
والذكريات
فرحة أمه لما ينجح
وضحكتها لما يسرح
حضن أخوه لما يبكي
وخناقاتهم علي حاجة تافهة
تيجي أخته تصلح ما بينهم
فيحضنوها
والصحاب والقعدة تحلي
والكلام و القلش يحلي
والرجوع في الفجر أحلي
والكلاب تعوي عليه
وهو سارح عاوز يسافر
فخد في وشه وراح مهاجر
