جورج موسي يكتب شعر: أنا اللي أخدت حصة ديني علي السلم

"أنا اللي أخدت حصة ديني علي السلم" انا اللي اخدت حصة ديني علي السلم ..... وانا اللي مشيت جنب حيطانك عشان اسلم ..... وانا اللي بكيت علي سنيني وانتي مش شايفه ... اصرخ بعلو الصوت من الظلم وانتي ولا سامعه.... ولما تعبت ...سكت .. وياريت سكاتي كان اكرم..... سكاتي و صراخي مش فارق ... مكاني متغيرش علي السلم انا الكافر ...انا الهامش المتهمش علي سنينك ولما اعافر واقول اسمي اهو شايفه علي جبينك .... إفتحي دفاترك .....دوري ... اسمي علي الغلاف..فكري انا اللي كاتب اول سطر... انا اللي بدعت اول فكر انا اول زرعه في طينك انا الاصل اللي عانك و بيعينك انا اللي عارفك ....وهما عاملين انهم عارفينك .... اشوف وشك القاسي في وشوش اللي سيباهم ... يهينوا اسلافي و يلعنوا اهلي وباين انتي وياهم ...... واسأل نفسي علي سكاتك ... واخاف لتكوني انتي اللي طلقاهم بيقولولي يا عضمه زرقا قوليلي طيب.. مين اللي زرقها ؟ لقيت اهانتي مش فارقه قلت افارق ....ملعون ابو اللي فرقها اسيبك ...وبرضه اسمي علي جبينك .... طيور مهاجره اه .....بس لسه حبينك .....