Bridging the Gap: International Student Reforms in Canada, but Safety Concerns Persist ثلاث قصص ملهمة في البطولة الافريقية الأخيرة Conductor Steven Lloyd -Gonzalez To Good News توسع الخطة الوطنية لرعاية الأسنان لتشمل كبار السن من 72 عاما أو أكثر لم يحدد الموعد... البنك المركزي الكندي يتوقع تخفيضات في أسعار الفائدة قصة «تفاحة» أبل.. أسرار مثيرة عن تطورها عبر السنين بعد 9 عقود من اختفائها.. العثور على حطام طائرة ”أميليا إيرهارت” سفاح ”الشطرنج” الروسي قَتل 49 بطرق بشعة آخرهم بالمطرقة الحكومة الفيدرالية تمدد الحظر على شراء الأجانب للمساكن في كندا رئيسة وزراء البرتا تكشف النقاب عن تغييرات في سياسة الهوية الجنسية للطلاب شرطة تورنتو تحذر من محتالين يجمعون تبرعات لـــــ ”سيك كيدز” من المنازل كندا ترسل 40 مليون دولار إضافية إلى غزة بعد تعليق التمويل لــــ ”الاونروا”

هاني صبحي يكتب: مجدي أفشة مفجر الحرب العالمية الثالثة

** مشهد رقم 1: نهار داخلي_ مقر FIFA بزيورخ_ غرفة التحقيق.. _ مستر مجدي "فشة"..انت متهم بنشر الكراهية ومعاداة السامية ومحاولة إحياء النازية، والاتيان بإشارة مجرمة قانوناً ومخالفة ميثاق FIFA بعدم إقحام الميول السياسية في مجال الرياضة.. فما قولك ؟ _ ابلع ريقك بس يابا الحاج، أحلى مسا عليك يا غالي.."أفشة" .. اسمي أفشة مش فشة، ودي ليها حكاية هقولهالك..انا اصلا اسمي محمد مجدي وكان عندنا محل فراخ صغير كده بنرزق منه، فلما كانت فرخة تجري ولا بطة تنط من فوق الاقفاص يقوموا نادهين عليا وايه بقى.. اكمني كنت صغير وخفيف كده. وباتنطط زي اليويو، اروح ضارب السبرنت وقافش ال.... _ اوكيه اوكيه مستر افشة..خش في الموضوع لو سمحت.. _ ياعم والله اللي بيحيي العباد ربنا.. غازية ايه اللي احييها بس احنا هنكفر؟..وبعدين قسما بالله انا ما اعرف واحدة اسمها سامية اصلا عشان اعاديها..بالك انت يا ابو الصحاب ،حتى لو لا سمح الله وربنا يستر على ولايانا كلنا ، لو حتى مدام سامية دي سمعتها مش قد كده ، برضه احنا خارجين من بيت نضيف. وملناش في سكة التلسين ورمي البلا ده ، واللي يستره ربه ميفضحوش العبد..كويسة ليها . ووحشة برضه ليها وياما الحيطان بتداري. ده انا اغلب من الغلب والله..ميغركش بس اني بلعب في الاهلي والقاضية ممكن وكل الحبشتكانات دي..انا إبن بلد واعجبك وبفطر على عربية الفول وبدبح في الأعياد اللي ربنا يقدرني عليه وأوزع على الغلابة..دي دنيا متفاتة يا جدع وكلها اخرتها ايه؟ متر في مترين ومش باقي للبني آدم غير سيرته وعمله الصالح..كل ده كلام في الهنتريش وكل الزياط ده أي هتش في الجلاش.. ده انا كنت بشاور لابويا الحاج مجدي في المدرج..دي اول مرة يحضر والله لو كنت اعرف إن كل العوق ده هيحصل ما كنت خليته ييجي اصلا.. وأنا عارف الحاج هتلر ده ..مش ده الجدع القصير اسم الله على مقامك ابو شنب صغير ده ؟ تصدق وتآمن بالله ؟ انا لحد ما كنت بلعب في بيراميدز، كنت فاكره هو وشارلي شابلن الاتنين واحد .. ياعم وربنا لتقولي بيقعد على قهوة ايه ونروح سوا أراضيه وأحب على راسه لو الحركة ضايقته..احنا ناس جدعان ونفهم في الأصول برضه والصلح خير وما محبة إلا بعد عداوة.. _ مستر افشة ..انت واضح انك مش مقدر خطورة وحساسية الموقف و... _ فكك يابا من اللوكلوك ده ..طب عهد مين ده ؟ _ ايه اعمل ايه ؟ _ مد ايدك ياعم وقول وعهد الله .. _ وعهد الله.. _ وعهد الله.. وعهد الله..وحق شبكة العشرة الكرام دول ما هحلك الليلة دي الا وأنت راجع معايا على الناصرية..عيب ياعم انا مش عويل قدامك متقلش مني بقى.. هدوقك طاجن بامية باللية مع شوية شوربة كوارع من عند بحة وادعيلي بقى لما تروح للمدام.. _ كابتن أفشة..يعني ايه " لية" ؟ _ ملكش دعوة بقى يا زميلي..سيب لي نفسك كده خالص. وانا هروق عليك.. اتفقنا يا شقيق ؟ _ اوكيه مستر افشة.. بس ممكن توصيهم يسووا مع طاجن البامية حتتين لحمة راس بالدمعة ومينسوش الفتة!! مشهد رقم 2 : _ حالة من الهدوء والسكينة، وروقان البال غير المبرر تسود كوكب الأرض، وإطلاق اسم مجدي أفشة على لجنة بناء السلام بالأمم المتحدة، ودعوته لإلقاء محاضرات دورية بمجلس الأمن _ مطعم صبحي كابر يستقبل وفد رفيع من الفيفا . وانفانتينو يبدي إعجابه بطاجن العكاوي _ بوتين يعلن سحب قواته من اوكرانيا ويدعو لمؤتمر عاجل لإقرار وقف إطلاق النار _ انتهاء حقبة التوتر بين الهند وباكستان وحل أزمة إقليم كشمير للأبد _ إعلان وحدة الكوريتين واعتزال رئيس كوريا الشمالية للسياسة والتفرغ لإدارة سلسلة محلات كشري بالعاصمة القديمة _ اعتراف الصين باستقلال تايوان، وانتهاء تجارة السلاح، وإعلان تجار المخدرات في كولومبيا مدينة بوجوتا عاصمة خالية من المخدرات _ عودة شاكيرا لجيرارد بيكيه واعتزال حسن شاكوش للغناء