دردشة…و بس:
عبد المجيد البقال (زجل مصري)
لو حوِّدت رجليك في حي العباسية شمال
وبصيت ببؤبؤ عينيك تلاقي عب مجيد البقال
ورف جنبه مليان صابون و رف تاني آخر جمال
إشي جبنة وإشي حلاوة والرز جوة الشوال
شوية منه يقع على الأرض ملانة مقشات ذهب
و كومة البصل متشعلقة في مسمار مدقوق بشياكة وأدب
و عبد المجيد واقف ورا بسطة و للطلبات فورا دأب
ولوحة خشب فوقيه مايلة متمسمرة و عليها اللقب:
"عبد المجيد البقال عبد ربه ابن خديجة شماتة"
وسبت ينزل له من تراسينا بصوت غجري بغتاتة
اثنين كيلو رز وأربعة كيلو بطاطا
البقال على طول جري ينفذ طلب السيادة
و ضروري ايديه مش خالية فيها نوتة وعلى سور ودنه قلم
هو راجل فعلا روتيني و بقال فعلا تلم
وصوت ثاني وصوت كمان يطلب و الرد يطلع عُلِم
وبنفس الطريقة يروح و بغلطة منه يتشتِم
و بعنظزية يرد جامد بجعير التنين:
"بالدور يا فندية ده نمرة واحد وده نمرة اثنين"
و مشاكل تبتدي تفور و يتلموا عليها البني أدمين
سيبكم أنتم م المعركة الدايرة و خليكم ليّ فاهمين
الغرض من الكلام ده كله: إنه حتى البقالين…ليهم روتين
