نشأت نصر يكتب: متزعلش

متزعلش لما تحس بظلم أقرب الناس ليك كمان متزعلش لما تحسه مش حسك و لا حتى عايز يكون أقرب الناس ليك .. متزعلش لما تكون إنسان عايش وسطنا ! أصل ده مش زمن الطيبين و لا الحنينين متزعلش لما تتظلم و تبقى جواك لوحدك متزعلش لما محدش يهتم يعرف حتى إيه جواك .. ده مش زمن المشاعر و الحب متزعلش لما تحس باليتم و تحبس دموعك متزعلش لما تكون جبل كله بيخبط فيك متزعلش لما تكون مش عارف تحكي و لا عارف تبكي و لا لاقي حتى حد تحكيله كمان متزعلش لو حد قالك مالك و إنت بقوه غريبه تقوله " نشكر ربنا في نعمه " متزعلش لو حسيت إنك بتقول رساله و محدش عايز يقراها و لا حتى مهتم بيها متزعلش لو النور في يوم قطع و حسيت ساعتها بنور ربنا و غيرك بيدور على شمعه متزعلش لو جيت على نفسك كتير عشان نفسك تموت إنسان و هما عايزينك تتغير متزعلش لو حسيت إنك إيجابي و طول الوقت بيقولوا إنك سلبي و بيحبطوك متزعلش لو كنت دايمآ تحب تبص للسما و تاخد أمل و ييجي إللي يحاول يكسرك متزعلش إنك دايمآ بتستحمل و دايمآ تخدم الغريب قبل القريب و مش عاجب متزعلش إنك مميز بس مش محظوظ متزعلش حتى لو خسرت كل حاجه و مش عارف تعمل إيه .. إفتكر أيوب متزعلش لأن ربنا عارف قلبك و شايف الظلم إللي إنت فيه بس الإكليل غالي و إللي بيظلمك زي إللي بيقتلك وسيله عشان ربنا بيحبك و عاملك إكليل صغنن مينفعش تدخل السما و إنت مرتاح هنا الكتاب مئالش كده بالعكس قال " في العالم سيكون لكم ضيق و لكن ثقوا أنا قد غلبت العالم " فمتزعلش و إفهم إنه قال كده بس لولاده إللي بيمسكوا فيه مهما حصل . تخيل بأه " عشان ماسك في ربنا هو عمال يغطسك في معمودية التجارب كل شويه و يطلعك و هكذا لغاية ما " تبيض أكثر من التلج " ساعتها تستحق تدخل بيته فمتزعلش أتون التجارب متراقب من ربنا و عينه عليك و دايمآ هيديك كتاف تشيل بيها و تعزيه عشان تشوفه وسط الأتون إوعى تزهق و لا تتعب و تقوله ليه يا رب لا إسمع كلامه و مهما حصل " متزعلش "