جورج موسي يكتب : لما بخاف
لما بخاف !
ولما بخاف كنت أجي في حضنك وأتخبي
والعيش الحاف من أيدك بيكفي وبتعشي
حضن براح بنام وأرتاح
حضنك نجدة بس أهو راح
حضنك يا أماه
كان بيعدي الليل بسواده في لحظة
وناري لو قايدة أتون
في حضنك كانت يا أماه بتطفي!
حضنك راح وأبنك يا أماه أتعري!
قولي لي فين الطرحة ؟!
شايلة الطرحة فين أنا عاوز أدفي
راح الحضن سيبيلي الطرحة
النار قايدة في قلبي وسارحه
وإن كان حضنك مش موجود
حاجة من ريحته تريح قلبي!
تطمن قلبي!
حتي إن كانت حتة طرحة
حتة طرحة بس تعود!
وتبقي كلمة :
حين ترحل الأم ترحل تلك التي أحبتك بالمجان و أعطتك حياتها بالمجان وسهرت و تألمت و عملت لأجلك بالمجان ! ترحل تلك التي آمنت بك بالمجان ووضعتك علي رأسها بالمجان و كانت تراك أعظم من الجميع أيضاً بالمجان ! ببساطة حين ترحل الأم يرحل المجان و يحين وقت دفع الفواتير !
سلام لروح أمي وأمهات رحلن بعد ما أعطين كل شئ بالمجان ! وسلام وفرح وغبطة للأحياء منهن ! لعل الجميع يعرف قدرهن قبل فوات ألآوان !
