جورج عبد المسيح يكتب شعر: ليه ساكت يا رب
ليه ساكت يا رب ...
ليه قافل البيبان
ومعدش فيه أمان
ليه سادد كل درب ...
انا فاكر ايام زمان
اللمه والجيران
والضحكه كانت جنان
مع ان العيشه كرب ...
كنا صغار وكان
اكتر حاجه بتوجع
فلان خاصم فلان
والا ميعاد امتحان
وبنت سابت حبيبها
بسرعه قبل الأوان
وكبرنا لقينا روحنا
عايشين علطول في حرب ...
الخطف بقي يوماتي
وقطع طريق ليلاتي
وكمان نهب وسلب ...
زمان كان فيه شتيمه
دلوقتي كله ضرب ...
كنا الذ شعب
خفه وروح وقلب
لو مره مساعدش صاحبه
بيبقي حاسس بذنب
الكره ليه عمانا
والحزن اهو ملانا
ومعدش لينا مهرب
لا في شرق والا غرب
ارحم حبه يارب ..
