نسرين جمعة تكتب: غربة وطن أم غربة روح ؟

تتردد بين الحين و الآخر فكرة الغربة و السفر , لم أخوض تجربة السفر خارج مصر أكثر من أسبوع حتى داخل مصر , أذكر ذهبنا بورسعيد للتصييف و كان عندى 14 سنة , كان لنا 15 يوم , رجعتهم بعد 13 يوم , ما اقدرتش أكمل , سفرية اليوم الواحد دى كتير و من أغربها نويبع , كنت باتفرج على قرية سريعا و رجعت يومها 9 مساء , لكن رغم كده كانت روحى غريبة وسط كثير من الناس , بعد وفاة أبى لم يعد لى روح قريبة من الأسرة , العائلات لا تتلاق و لا حتى اتصال تليفونى فى المناسبات , الأصدقاء قليل منهم قريبون و لكن دائما نحن مشغولون , الجيران , حدث و لا حرج , فى يوم من 20 سنة أول رمضان خبطت على أحد الجيران سألته عن زوجته رد على و من على الباب فيه حاجة ؟ قلت له أبدا بس النهاردة أول رمضان كل سنة و انتم طيبين , و تركته إلا ما قال حتى اتفضلى , ده المجتمع الصغير . ندخل بقى للمجتمع الأكبر , طبعا مافيش أى مشاركة من أى نوع , لا رأى و لا صوت و لا حاجة تحس إنك هوا لاحد شايفك و لا سامعك و لا دارى بوجودك من أساسه , قمع و قهر و ذل , حتى اللى بيقول عمل مدنى و تطوعى , دى حدوتة مش لنا المصريين العاديين , كل مؤسسة , جمعية , نقابة أو نادى كله قافل على نفسه و مكتفى و ما تفهمش بقى مين دول و لا إيه دول , أصل الموضوع ده بالتحديد كان متقسم بين أتباع سلطة حاكمة فاسدة و بين الاخوان و لو عندك اصرار تنضم أهلا و مرحبا بشروطهم , ممنوع التفكير , ممنوع الاعتراض , و إلا ...أبسط العقوبات النبذ ده لو سابوك فى حالك , فضل إيه تانى ... الروح تواقة للحب و العطاء , الفطرة جعلتها تشعر بمسئوليتها فى اعمار الأرض , تعمل أى عمل تنتمى للأرض اللى انت فيها , لو ده ماحصلش , بتغترب و تنفصل عن العالم كله لأنك مش عايش طبيعى . تصدقوا الحاجة الوحيدة المسموح بها كان إيه تنحرف فكريا و نفسيا و تتقوقع مع شيوخ تعطيهم عقلك و تقفل قلبك و تتحول لمسخ , و يقنعوك كفاية تربى أولادك خليك فى حالك , الخروج على الحاكم حرام حتى لو ظالم , اشتغلوا علينا بهارمونية شديدة حتى نغترب عن العالم بأسره. الغربة يا سادة غربة روح و ليست غربة مكان , تشعر بآدميتك و تعامل معاملة إنسانية , تحترم حقوقك , و لا يضيع العدل فى عالمك أيا كان مكانه ستألف المكان و الصحبة و سيظل الوطن فى قلبك و مادام لازال فى القلب رغم البعد فاعلم أنك ليس بغريب مهما بعدت المسافات , لكنك محظوظ لأن أصبح لك وطن إنسانى آخر , و لولا سفر أبناء نوح فى بقاع الأرض ماكان هذا الكوكب موجود , اختلاط البشر و انتشارهم فى العالم هو أهم مكتسبات الإنسانية لإعمار الكرة الأرضية . نسرين جمعة [email protected]