نسرين جمعة تكتب: إستفتاء مصري جداً

إستفتاء غير مسبوق فى مظاهره و دلالاته , إستفتاء شعبى حقيقى من المصريين اللى بيمثلوا القاعدة العريضة من الشعب , الطبقة الفقيرة المتطلعة لحياة أفضل , الطبقة المتوسطة بدرجاتها المختلفة , المصريين الغير مصنفين و لا متحزبين , لا دور و لا مشاركة فى أى حياة سياسية غير حقيقية " استفتاءات و انتخابات عصر السادات و مبارك " , المصريين اللى كفروا بكل من يوجههم و هو مدعى سواء مشايخ و لا سياسيين , مثقفين و نخبويين ولا إعلاميين , كل دول و لا يفرقوا مع المصريين , كل دول على فيسبوك و تويتر لا يتابعوهم و لا يعرفوا يتابعوهم أصلا , حتى التلفزيون ماعندوش وقت يتفرج ب 3 ساعات على برناج فلان الفلانى و علان العلانى , المصريين دول هم القاعدة الحقيقية لمصر و هم اللى بيوجهوا السياسات , الحكام الطغاة ما بيفهوهمش و لا يلقوا لهم بالاً , لكن لو كانوا فهموهم فعلا , كان حذروا منهم جداً , و أكيد كانت أمور كتير اتغيرت , المصرى مش نكدى و لا يحب النكد , حتى فى أصعب المواقف تلاقيه يسخر من نفسه علشان بس يضحك , المصرى ده اللى بيهزم أحزانه و همومه بضحكة أكيد قوى و عنده مخزون كبير من الارادة و الصبر و الطاقة , بس يتفتح له الباب و ياخد فرصة حقيقية. اشهد إنى أول مرة أشوف استفتاء بالرقص و الغناء , الناس كانت بتنظر لبعضها و تبتسم , كأنها بتهنى بعضها , فرحانة من قلبها , راحت طواعية من غير رشوة و لا غيره , ست عجوزة هادية و بسيطة كانت قبلى , يادوب مسكت الورقة و راحت معلمة صح من غير ماتروح لمكان التصويت , الموظفة ابتسمت , قالت لها الست الأميرة دى , خلينا نخلص , عايزة تقول كفاية تعبنا و أنا عجوزة ماعنديش وقت كتير , عايزة ارتاح و أشوف مصر مرتاحة و اللى زينا شوفوهم و اسموعوهم و حسوا بيهم , رسائل كتيرة من أولاد بلدى الفرحانين و متفائلين باللى جاى , المصرى الحقيقى حسن النية و طيب , بيصدق اللى بيقف جنبه و يراعيه , لكن أكيد برضه مصحصح و إلا ما كانت ثورة 25 يناير و لا قبلها حرب أكتوبر , تاريخ المصريين ملئ بالانتفاضات حين يفيض به الكيل , لكن صبره يجعل البعض يعتقد بضعفه ومن الآخر يتصوروا سهل يضحك عليه , و ده اللى بيحير أعداؤه دايما و بيلخبط حساباتهم والطامعين فى مصر لن ينتهوا, لو مجرد مجموعات من الشباب و النشطاء فقط قامت بثورة 25 ينايرو لازم نعترف بدورهم لتحفيز و تشجيع الشعب وقتها استحالة كانت تنجح الثورة , بمنتهى البساطة تفتح المعتقلات و حجرات التعذيب , الثورة نجحت بالمصريين كلهم , لكن لما تسمع المصرى المؤمن بالفطرة من 7000 سنة , عارف يقول إيه , يقول ربنا اللى نجح الثورة دى , احنا بنسعى بس و ده توفيق من ربنا , و ده حقيقى و دى قناعة لا جدال فيها بالنسبة لى و لأغلب المصريين . كلمة لمن يروج فكرة الشباب لم يشاركوا , بنتى من الشباب , طوابير من الشباب , كل دول اللى صوتوا تم تهميشهم , هل يطلق على الشباب فى مصر من يتصدروا المشهد السياسى والاعلامى بكل صوره و منها الفيسبوك ؟؟ هنا علينا بوقفة واضحة , الموضوعية يا سادة , الاحصاءات و المعلومات أهم كثيرا من كلام لا قاعدة له و لا أساس , فضلا عن التروى و التفكير جيد و قراءة المشهد بعمق . كلمة أخيرة لمن يحكم مصر التزموا بالوعود , ارفعوا حالة المصرى الاقتصادية الآن , قرارات ثورية فورية تنشل المصريين من معاناتهم الآن, لم يعد للمصرى صبر أكثر من هذا , ليتكم تقضوا أسبوعا واحدا فى هذه المعيشة الضنك , أشك إن استطعتم استكمال يوم واحد , مسئولون أمام هذا الشعب الطيب و أمام التاريخ , إن أخلفتم فالعواقب وخيمة على الجميع,و فى نفس الوقت استكملوا التطهير من بقايا عصابة مبارك و لتطبقوا عليهم العزل السياسى , و العزل الاعلامى , هناك وجوه لا يطيق الشعب المصرى أن تطل عليه بعد الآن فى كل المجالات رجاء ارحموا هذا الشعب من اطلالاتهم , مصر فى هذه المرحلة التاريخية الجديدة تواقة للوجوه الجديدة المخلصة , المتواضعة هرمنا من هؤلاء المزيفين , المتعالين , من فضلكم الآن. نسرين جمعة [email protected]