”المصريين” ... براند خفة الدم الغير قابل للتكرار
الشعب المصري ممكن يكون عنده مشاكل كتير، أزمات اقتصادية، غلاء أسعار، ضيق معيشة! حتى لما بيمر بثورات، أوبئة، زلزال، أي حاجة هتلاقي عنده خاصية بتشتغل أوتوماتيك كل يوم رغم كل حاجة أنه بيخلق مواقف وأفيهات ونكت على كل اللي بيمر بيه! أنت ممكن تقعد في قهوة في أي حتة في العالم، في ڤيينا، ولا مدريد، في نيويورك ولا في زيورخ، في باريس أو لندن ولا أمستردام! أقعد في أي حتة صعب تلاقي مجموعة من البشر دموعها بتنزل من كتر الضحك وسط الأزمات على الأزمات نفسها غير في المحروسة، مش هروب من المشاكل والأزمات ولا أنكار للواقع لكن هي طبيعة عند الشغب المصري!
شعب بيحب الضحك بيحب القلش، يمكن علشان كده الشعب ده قادر يصمد قدام كل اللي بيمر بيه! والغريبة أن رغم كل اللي مر بيه الشعب المصري بس مخسرش ضحكته، أنا فاكر أيام الثورة المصرية، كنا كلنا خايفين من المجهول، نظام سقط والبلد فيها انفلات أمني، الأشغال متعطلة والناس مش عارفة بكرة جايب لها أيه، لكن الشعب المصري فضل محتفظ بخفة دمه، كنا بنقلش على كل حاجة حوالينا! متهيألي أحنا ممكن يكون ترتيبنا متأخر في حاجات كتير، في التعليم، في الصحة، في ظروف المعيشة، في الرفاهية، في نظافة الشوارع، في الحريات، أه متأخرين في ده كله وأه دي كلها حاجات مهمة محدش يقدر ينكرها في مقاييس تقدم الشعوب، لكن الضحكة كمان مهمة، الضحكة اللي من القلب بحد ساعات بتبقي الوقود اللي ممكن تقويك أنك تكمل المشوار رغم الصعوبات والضحكة دي ساعات بشوفها عزيزة عند بعض الثقافات! مبتحسهاش سهلة كده وبتطلع بشكل عفوي زي عندنا، عندنا متهيألي أحنا بنحتل الصدارة في الضحك، بنحتل الصدارة في خفة الدم، بنحتل الصدارة في أننا نحول المواقف لضحك من القلب! علشان كده عمرك ما هتدخل مسرحية في أي بلد عربي هتضحك فيها زي ما هتضحك في المسرح المصري، أحنا بلد عادل أمام وسعيد صالح وسمير غانم بلد أسماعيل ياسين وعلي الكسار وحسن فايق وشكوكو، بلد هنيدي وهاني رمزي! أحنا بلد المسارح اللي بيجي ليها الناس من كل البلاد العربية علشان يستمتعوا بالفن المصري ويستمتعوا بخفة الدم المصرية.
مصر دي بلد بيجري في دمها خفة الدم، تحس ان ماية النيل اللي بنشرب منها فيها تركيبة كده بتخلينا بنحب الضحك والهزار والقلش! قعدة الصحاب في مصر على القهوة والضحك والهزار والنكت والقلش ليها طعم صعب تلاقيه في أي حته في العالم، ممكن تلف العالم كله لكن طعم القعدة دي مش هتلاقيه غير في المحروسة
لمة صحاب على مصطبة والشاي وجب
يا محلا شرب الشاي على الأعتاب
ويا محلا قعدة الصحاب على الأعتاب
شوية هزار علي جد علي حبة عتاب
توليفة كدة مصرية لكن توليفة عجب
لما يتلم حبة صحاب على مصطبة
يتلموا والشاي وجب!
