ايليا مقار يكتب: الوحدة الوطنية
انا كنت زيكم كده فاكر ان الوحدة الوطنية دي حاجة بين المسلمين والمسيحيين بسسس. أبسوليوتلي.. المفهوم ده إتغير تماماً في ال 3 سنين اللي فاتوا، واصبحنا كلنا.. مصريين.. حبايب حبايب.. نسيج واحد مش اتنين ولا تلاثة:
الأول كنا كلنا ضد مبارك والشرطة والسلفيين، وفي 25 يناير بقينا احنا المدنيين وشوية سلفيين والإخوان والجيش والشعب إيد واحدة ومعانا قناة الجزيرة وحبايبنا في قطر وكل دول في جنب ضد مبارك والشرطة والفلول ودول الخليج اللي عاوزين يرجعوا مبارك في جنب تاني.
وبعدين مبارك سقط وجه المجلس العسكري وبقينا التيار المدني في جنب ضد الإخوان والشرطة والفلول والمجلس العسكري ويسقط يسقط حكم العسكر وكده وضد دول الخليج اللي خايفة علي نفسها وبتساند الفلول
وبعدين الإخوان ركبوا وبقينا تيار مدني مش عاوز الجيش ولا الشرطة ولا الإخوان ولا العسكر في جنب، وتيار مدني وفلول بيطالب الجيش بالنزول والشعب والجيش ايد واحدة في جنب والإخوان والداخلية والسلفيين في جنب والجيش في جنب وشوية ناس ملهاش دعوة في جنب
وبعدين كل الناس دي نزلت ضد الإخوان والجيش انضم ليهم ضد الإخوان وبقا الفلول وشوية مدنيين علي شوية ناس ملهاش دعوة علي دول الخليج في جنب وليبراليين تانيين ومدنيين في جنب ضد الليبراليين الأولانيين والإخوان، والإخوان والسلفيين وشوية ناس ملهشا دعوة والجزيرة وقطر وتركيا في جنب.
يعني ببساطة
في 25 يناير 2011 كان إبراهيم عيسي والبرادعي وأحمد حرارة وطنطاوي وأمير قطر والسيسي ومحمد بديع وانا وانت في جنب، ومبارك ومرتضي منصور وعسكري الداخلية في جنب.
دلوقتي داخلين على 25 يناير 2014، ابراهيم عيسى بقا في جنب، والبرادعي في جنب وحرارة في جنب وطنطاوي في جنب والسيسي في جنب وبديع في جنب ومبارك في جنب ومرتضي في جنب والداخلية في جنب. المطلوب بقا مني ومنك، في وسط الجناب دي كلها، نختار لينا جنب، ووحياة أبوك، متقوليش اخترت مصر وأقعد علي جنب!
