أنا الذي والذين وكله موجود في كتابي! يا عزيزي كم من زواهي حولنا؟!
من كام يوم ومن غير مناسبة خرج علينا عالم الآثار أو اللي كان كل واحد فينا شايف فيه أنه الألفة بتاعة الآثار ووزير الآثار وكل حاجة في الآثار العالم الفذ الذي والذين: زاهي حواس! خرج علينا عالم الآثار سيادة الأستاذ الدكتور زاهي في بود كاست مع أشهر بودكاستر في العالم چو روجان اللي بيتابعه ملايين، من الوهلة الأولي تحس بأن في حاجة مش طبيعية، السيجار ونبرة الصوت والانحيازية الركيكة أو المتهالكة مع فرط الثقة بالذات مع ضحالة الحجة توليفة كده قعدت ساعتين بالظبط خلت چو مورجان يخرج عن شعوره كذا مرة بألفاظ عيب! كلمة (أنا) كررها زاهي حواس عشرات المرات ويمكن مئات المرات لدرجة أن زاهي حواس قال لچو في تعالي غريب: تعرف يا چو انا الأيچيبتولوتس الوحيد اللي open minded!
مش قادر أنسي تعبيرات وجه چو وهو يسأله كيف أستطاع القدماء المصريين نقل حجارة وزنها أكتر من خمسين لمائة طن كل تلك المسافة التي تقدر بمئات الكيلومترات فيرد زاهي لقد كان مشروعاً قومياً!!!
أيوه فين الإجابة! چو خرج عن شعوره لا وكل ما يطلب منه چو أثبات يجيبه علي الشاشة من علي الأنترنت يرد لا مش موجود علي النت، ده في كتابي، يقوله زاهي علي صور اكتشافاته العظيمة يسأله چو فين الصور اللي معاك؟! موجودة أونلاين؟!
لا على الكمبيوتر
فين الكمبيوتر
في لاس فيجاس
چو رد بكلمة عيب تاني !
زاهي حواس قعد ساعتين ما بين التفخيم من نفسه لدرجة مستفزة وبين الرد علي حاجات چو مش فاهمها لدرجة أنه قال له ليه أنا حاسس أنك في معركة مع ناس مش موجودة، رد زاهي لأنهم بيهاجموني هم اللي في معركة معايا ، قاله چو أنا بديك فرصة أنك ترتاح من ده ! الناس دي مش موجودة دلوقتي ومن قرفه چو قام قايل له كلمة عيب تاني!
زاهي حواس نسي أنه قاعد مع محاور أجنبي، هيسأله ويقاوح معاه مش مع محاور مصري هيسيبه يقول الهنتريش اللي بيقوله ويغني معاه ويفخم فيه ويردد نغمة أنت أعظم عظمات العظمة يا زاهي!
وتبقي كلمة. .. حولنا الكثير من هؤلاء الزواهي، كثيرون يتشددون لأفكارهم ويعتقدون أنهم ملكوا الحقيقة وأنهم مارادونا الشغلانة ! للأمانة أنا لا أعلم إلى الآن كيف تحمل چو روجان حواراً مثل هذه مع شخصاً مثل زاهي لمدة ساعتين متواصلتين!
بالمناسبة خرج چو روجان بعد اللقاء وقال أن حواره مع زاهي حواس هو أسوأ حلقة له علي الأطلاق وأن حواس رجل منغلق ومتشدد لأفكاره!
